 |
 |
 |
|
 |
|
 |
|
 |
|
 |
|
 |
 |
|
Author: Anonymous Creation of machine-readable version: Charlotte Robertson and Tomoko Nishioka, University of Virginia Library Electronic Text Center Conversion to TEI.2-conformant markup: Charlotte Robertson and Tomoko Nishioka, University of Virginia Library Electronic Text Center URL: http://etext.lib.virginia.edu/japanese ©2001 by the Rector and Visitors of the University of Virginia About the original source: Title: Kokin wakashu Author: Anonymous Publisher: [See Editorial Note.] やまとうたは、人のこころをたねとして、よろづのことのはとぞなれりける、世中にあ る人、ことわざしげきものなれば、心におもふことを見るものきくものにつけていひい だせるなり、花になくうぐひす、水にすむかはづのこゑをきけば、いきとしいけるもの いづれかうたをよまざりける、ちからをもいれずしてあめつちをうごかし、めに見えぬ おに神をもあはれとおもはせ、をとこをむなのなかをもやはらげ、たけきもののふの心 をもなぐさむるは、うたなり このうた、あめつちのひらけはじまりける時よりいできにけり、あまのうきはしのした にて、め神を神となりたまへる事をいへるうたなり、しかあれども、世につたはること は、ひさかたのあめにしては、したてるひめにはじまり、したてるひめとは、あめわか みこのめなり、せうとの神のかたち、をか、たににうつりてかかやくをよめるえびす哥 なるべし、これらはもじのかずもさだまらず、うたのやうにもあらぬことども也、あら かねのつちにしては、すさのをのみことよりぞおこりける、ちはやぶる神世には うたのもじもさだまらず、すなほにして、事の心わきがたかりけらし、ひとの世となり て、すさのをのみことよりぞみそもじあまりひともじはよみける、すさのをのみこと は、あまてるおほむ神のこのかみ也、女とすみたまはむとて、いづものくにに宮づくり したまふ時に、その所にやいろのくものたつを見てよみたまへる也、＜やくもたついづ もやへがきつまごめにやへがきつくるそのやへがきを＞、かくてぞ花をめで、とりをう らやみ、かすみをあはれび、つゆをかなしぶ心ことば、おほくさまざまになりにける、 とほき所もいでたつあしもとよりはじまりて、 年月をわたり、たかき山もふもとのちりひぢよりなりて、あまぐもたなびくまでおひの ぼれるごとくに、このうたもかくのごとくなるべし、なにはづのうたは、みかどの おほむはじめなり、おほさざきのみかどの、なにはづにてみこときこえける時、東宮を たがひにゆづりて、くらゐにつきたまはで、三とせになりにければ、王仁といふ人のい ぶかり思ひて、よみてたてまつりけるうた也、この花は梅のはなをいふなるべし、あさ か山のことばは、うねめのたはぶれよりよみて、かづらきのおほきみをみちのおくへつ かはしたりけるに、くにのつかさ、事おろそかなりとて、 まうけなどしたりけれど、すさまじかりければ、うねめなりける女の、かはらけとりて よめるなり、これにぞおほきみの心とけにける、＜あさか山かげさへ見ゆる山の井のあ さくは人をおもふのもかは＞、このふたうたはうたのちちははのやうにてぞ、手ならふ 人のはじめにもしける、そもそもうたのさまむつなり、からのうたにもかくぞあるべ き、そのむくさのひとつには、そへうた、おほさざきのみかどをそへたてまつれるう た、＜なにはづにさくやこの花ふゆごもり いまははるべとさくやこのはな＞といへるなるべし、ふたつには、かぞへうた、＜さく 花におもひつくみのあぢきなさ身にいたづきのいるもしらずて＞といへるなるべし、こ れはただ事にいひて、ものにたとへなどもせぬものなり、このうたいかにいへるにかあ らむ、その心えがたし、いつつにただことうたといへるなむこれにはかなふべき、みつ にはなずらへうた、＜きみにけさあしたのしものおきていなばこひしきごとにきえやわ たらむ＞といへるなるべし これはものにもなずらへて、それがやうになむあるとやうにいふ也、この哥よくかなへ りとも見えず、＜たらちめのおやのかふこのまゆごもりいぶせくもあるかいもにあはず て＞、かやうなるやこれにはかなふべからむ、よつにはたとへうた、＜わがこひはよむ ともつきじありそうみのはまのまさごはよみつくすとも＞といへるなるべし、これはよ ろづのくさ木とりけだものにつけて心を見するなり、このうたはかくれたる所なむな き、されどはじめのそへうたとおなじやうなれば、すこしさまをかへたるなるべし、 ＜すまのあまのしほやくけぶり風をいたみおもはぬ方にたなびきにけり＞、この哥など やかなふべからむ、 いつつにはただことうた、＜いつはりのなき世なりせばいかばかり人のことのはうれし からまし＞といへるなるべし、これはことのととのほりただしきをいふ也、この哥の心 さらにかなはず、とめうたとやいふべからむ、＜山ざくらあくまでいろを見つるかな花 ちるべくも風ふかぬよに＞、むつにはいはひうた、＜このとのはむべもとみけりさき草 のみつばよつばにとのづくりせり＞といへるなるべし、 これは世をほめて神につぐる也、このうたいはひうたとは見えずなむある、＜かすがの にわかなつみつつよろづ世をいはふ心は神ぞしるらむ＞、これらやすこしかなふべから む、おほよそむくさにわかれむ事はえあるまじき事になむ、今の世中いろにつき人の心 花になりにけるより、あだなるうた、はかなきことのみいでくれば、いろごのみのいへ に、むもれ木の人しれぬこととなりて、まめなるところには花すすきほにいだすべきこ とにもあらずなりにたり、そのはじめを おもへばかかるべくなむあらぬ、いにしへの世世のみかど、春の花のあした、秋の月の 夜ごとに、さぶらふ人人をめして、ことにつけつつうたをたてまつらしめたまふ、ある は花をそふとてたよりなき所にまどひ、あるは月をおもふとてしるべなきやみにたどれ る心心を見給ひて、さかしおろかなりとしろしめしけむ、しかあるのみにあらず、さざ れいしにたとへ、つくば山にかけてきみをねがひ、よろこび 身にすぎ、たのしび心にあまり、ふじのけぶりによそへて人をこひ、松虫のねにともを しのび、たかさごすみの江のまつもあひおひのやうにおぼえ、おとこ山のむかしをおも ひいでてをみなへしのひとときをくねるにも、うたをいひてぞなぐさめける、又春のあ したに花のちるを見、秋のゆふぐれにこのはのおつるをきき、あるはとしごとにかがみ のかげに見ゆる雪と浪とをなげき、草のつゆ水あわを見て わが身をおどろき、あるはきのふはさかえおごりて時をうしなひ世にわび、したしかり しもうとくなり、あるは松山の浪をかけ、野なかの水をくみ、秋はぎのしたばをなが め、あかつきのしぎのはねがきをかぞへ、あるはくれ竹のうきふしを人にいひよしの河 をひきて世中をうらみきつるに、今はふじの山も煙たたずなり、ながらのはしもつくる なりときく人は うたにのみぞ心をなぐさめける、いにしへよりかくつたはるうちにも、ならの御時より ぞひろまりにける、かのおほむ世やうたの心をしろしめしたりけむ、かのおほむ時に、 おほきみつのくらゐかきのもとの人まろなむうたのひじりなりける、これはきみもひと も身をあはせたりといふなるべし、秋のゆふべ竜田河にながるるもみぢをば、みかどの おほむめににしきと 見たまひ、春のあしたよしのの山のさくらは人まろが心にはくもかとのみなむおぼえけ る、又山の辺のあかひとといふ人ありけり、うたにあやしくたへなりけり、人まろはあ かひとがかみにたたむことかたく、あか人は人まろがしもにたたむことかたくなむあり ける、ならのみかどの御うた、＜たつた河もみぢみだれてながるめりわたらばにしきな かやたえなむ＞、人まろ、＜梅花それとも見えず久方のあまぎる雪のなべてふれれ ば＞、＜ほのぼのとあかしのうらのあさぎりに島がくれ行く舟をしぞ思ふ＞、 赤人、＜春ののにすみれつみにとこし我ぞのをなつかしみひと夜ねにける＞、＜わかの 浦にしほみちくれば方をなみあしべをさしてたづなきわたる＞、この人人をおきて又す ぐれたる人もくれ竹の世世にきこえ、かたいとのよりよりにたえずぞありける、これよ りさきのうたをあつめてなむ方えふしふとなづけられたりける、ここにいにしへのこと をもうたの心をもしれる人 わづかにひとりふたりなりき、しかあれどこれかれえたるところ、えぬところたがひに なむある、かの御時よりこのかた、年はももとせあまり、世はとつぎになむなりにけ る、いにしへの事をもうたをも、しれる人よむ人おほからず、いまこのことをいふに、 つかさくらゐたかき人をば、たやすきやうなればいれず、そのほかにちかき世に、その 名きこえたる人は、すなはち 僧正遍昭は、うたのさまはえたれどもまことすくなし、たとへばゑにかけるをうなを見 ていたづらに心をうごかすがごとし、＜あさみどりいとよりかけてしらつゆをたまにも ぬけるはるの柳か＞、＜はちすばのにごりにしまぬ心もてなにかはつゆをたまとあざむ く＞、さがのにてむまよりおちてよめる、＜名にめでてをれるばかりぞをみなへしわれ おちにきと人にかたるな＞、ありはらのなりひらはその心あまりてことばたらず、しぼ める花のいろなくてにほひ のこれるがごとし、＜月やあらぬ春やむかしの春ならぬわが身ひとつはもとの身にし て＞、＜おほかたは月をもめでじこれぞこのつもれば人のおいとなるもの＞、＜ねぬる よのゆめをはかなみまどろめばいやはかなにもなりまさるかな＞、ふんやのやすひでは ことばはたくみにて、そのさま身におはず、いはばあき人のよききぬきたらむがごと し、＜吹からによもの草木のしをるればむべ山かぜをあらしといふらむ＞、深草のみか どの御国忌に、＜草ふかきかすみのたににかげかくしてる日のくれしけふにやはあら ぬ＞、宇治山のそうきせんは、ことば かすかにしてはじめをはりたしかならず、いはば秋の月を見るにあかつきのくもにあへ るがごとし、＜わがいほはみやこのたつみしかぞすむ世をうぢ山と人はいふなり＞、よ めるうたおほくきこえねば、かれこれをかよはしてよくしらず、をののこまちは、いに しへのそとほりひめの流なり、あはれなるやうにてつよからず、いはばよきをうなのな やめる所あるににたり、つよからぬはをう なのうたなればなるべし、＜思ひつつぬればや人の見えつらむゆめとしりせばさめざら ましを＞、＜いろ見えでうつろふものは世中の人の心の花にぞありける＞、＜わびぬれ ば身をうきくさのねをたえてさそふ水あらばいなむとぞ思ふ＞、そとほりひめのうた、 ＜わがせこがくべきよひなりささがにのくものふるまひかねてしるしも＞、おほともの くろぬしは、そのさまいやし、いはばたきぎおへる山びとの花のかげにやすめるがごと し、＜思ひいでてこひしき時ははつかりのなきてわたると人はしらずや＞、＜かがみ山 いざたちよりて見てゆかむとしへぬる身はおいやしぬると＞、 このほかの人人その名きこゆる、野辺におふるかづらのはひひろごり、はやしにしげき このはのごとくにおほかれど、うたとのみ思ひてそのさましらぬなるべし、かかるにい ますべらぎのあめのしたしろしめすこと、よつの時ここのかへりになむなりぬる、あま ねきおほむうつくしみのなみ、やしまのほかまでながれ、ひろきおほむめぐみのかげ、 つ くば山のふもとよりもしげくおはしまして、よろづのまつりごとをきこしめすいとま、 もろもろのことをすてたまはぬあまりに、いにしへのことをもわすれじ、ふりにしこと をもおこしたまふとて、いまもみそなはし、のちの世にもつたはれとて、延喜五年四月 十八日に大内記きのとものり、御書のところのあづかりきのつらゆき、さきのかひのさ う官おほし かふちのみつね、右衛門の府生みぶのただみねらにおほせられて、万えふしふにいらぬ ふるきうたみづからのをもたてまつらしめたまひてなむ、それがなかにむめをかざすよ りはじめて、ほととぎすをきき、もみぢををり、雪を見るにいたるまで、又つるかめに つけてきみをおもひ人をもいはひ、秋はぎ夏草を見てつまをこひ、あふさか山にいたり て たむけをいのり、あるは春夏秋冬にもいらぬくさぐさのうたをなむえらばせたまひけ る、すべて千うた、はたまき、名づけてこきむわかしふといふ、かくこのたびあつめえ らばれて、山した水のたえず、はまのまさごのかずおほくつもりぬれば、いまはあすか がはのせになるうらみもきこえず、さざれいしのいはほとなるよろこびのみぞあるべ き、それまくら ことば、春の花にほひすくなくして、むなしき名のみ秋の夜のながきをかこてれば、か つは人のみみにおそり、かつはうたの心にはぢおもへど、たなびくくものたちゐなくし かのおきふしは、つらゆきらがこの世におなじくむまれて、このことの時にあへるをな むよろこびぬる、人まろなくなりにたれど、うたのこととどまれるかな、たとひ時うつ り ことさり、たのしびかなしびゆきかふとも、このうたのもじあるをや、あをやぎのいと たえず、まつのはのちりうせずして、まさきのかづらながくつたはり、とりのあとひさ しくとどまれらば、うたのさまをもしり、ことの心をえたらむ人は、おほぞらの月を見 るがごとくにいにしへをあふぎて、いまをこひざらめかも 
ふるとしに春たちける日よめる としのうちに春はきにけりひととせをこぞとやいはむことしとやいはむ はるたちける日よめる 袖ひちてむすびし水のこほれるを春立つけふの風やとくらむ 題しらず 春霞たてるやいづこみよしののよしのの山に雪はふりつつ 二条のきさきのはるのはじめの御うた 雪の内に春はきにけりうぐひすのこほれる涙今やとくらむ 題しらず 梅がえにきゐるうぐひすはるかけてなけどもいまだ雪はふりつつ 雪の木にふりかかれるをよめる 春立てば花とや見らむ白雪のかかれる枝にうぐひすぞなく 題しらず 心ざしふかくそめてし折りければきえあへぬ雪の花と見ゆらむ ある人のいはく、さきのおほきおほいまうちぎみの 哥なり 二条のきさきのとう宮のみやすんどころときこえけ る時、正月三日おまへにめして、おほせごとあるあひだに、日はてりながら雪のかしら にふりかかりけるをよませ給ひける 春の日のひかりにあたる我なれどかしらの雪となるぞわびしき ゆきのふりけるをよめる 霞たちこのめもはるの雪ふれば花なきさとも花ぞちりける 春のはじめによめる はるやとき花やおそきとききわかむ鶯だにもなかずもあるかな はるのはじめのうた 春きぬと人はいへどもうぐひすのなかぬかぎりはあらじとぞ思ふ 寛平御時きさいの宮のうたあはせのうた 谷風にとくるこほりのひまごとにうちいづる浪や春のはつ花 花のかを風のたよりにたぐへてぞ鶯さそふしるべにはやる うぐひすの谷よりいづるこゑなくは春くることをたれかしらまし 春たてど花もにほはぬ山ざとはものうかるねに鶯ぞなく 題しらず 野辺ちかくいへゐしせればうぐひすのなくなるこゑはあさなあさなきく かすがのはけふはなやきそわか草のつまもこもれり我もこもれり かすがののとぶひののもりいでて見よ今いくかありてわかなつみてむ み山には松の雪だにきえなくに宮こはのべのわかなつみけり 梓弓おしてはるさめけふふりぬあすさへふらばわかなつみてむ 仁和のみかどみこにおましましける時に、人にわか なたまひける御うた 君がため春ののにいでてわかなつむわが衣手に雪はふりつつ 哥たてまつれとおほせられし時よみてたてまつれる かすがののわかなつみにや白妙の袖ふりはへて人のゆくらむ 題しらず はるのきるかすみの衣ぬきをうすみ山風にこそみだるべらなれ 寛平御時きさいの宮の哥合によめる ときはなる松のみどりも春くれば今ひとしほの色まさりけり 哥たてまつれとおほせられし時によみてたてまつれ る わがせこが衣はるさめふるごとにのべのみどりぞいろまさりける あをやぎのいとよりかくる春しもぞみだれて花のほころびにける 西大寺のほとりの柳をよめる あさみどりいとよりかけてしらつゆをたまにもぬける春の柳か 題しらず ももちどりさへづる春は物ごとにあらたまれども我ぞふり行く をちこちのたづきもしらぬ山なかにおぼつかなくもよぶこどりかな かりのこゑをききてこしへまかりにける人を思ひて よめる 春くればかりかへるなり白雲のみちゆきぶりにことやつてまし 帰雁をよめる はるがすみたつを見すててゆくかりは花なきさとにすみやならへる 題しらず 折りつれば袖こそにほへ梅花有りとやここにうぐひすのなく 色よりもかこそあはれとおもほゆれたが袖ふれしやどの梅ぞも やどちかく梅の花うゑじあぢきなくまつ人のかにあやまたれけり 梅花たちよるばかりありしより人のとがむるかにぞしみぬる むめの花ををりてよめる 鶯の笠にぬふといふ梅花折りてかざさむおいかくるやと 題しらず よそにのみあはれとぞ見し梅花あかぬいろかは折りてなりけり むめの花ををりて人におくりける 君ならで誰にか見せむ梅花色をもかをもしる人ぞしる くらぶ山にてよめる 梅花にほふ春べはくらぶ山やみにこゆれどしるくぞ有りける 月夜に梅花ををりてと人のいひければ、をるとてよ める 月夜にはそれとも見えず梅花かをたづねてぞしるべかりける はるのよ梅花をよめる 春の夜のやみはあやなし梅花色こそ見えねかやはかくるる はつせにまうづるごとにやどりける人の家に、ひさ しくやどらで、ほどへてのちにいたれりければ、かの家のあるじ、かくさだかになむや どりはあるといひいだして侍りければ、そこにたてりけるむめの花ををりてよめる 人はいさ心もしらずふるさとは花ぞ昔のかににほひける 水のほとりに梅花さけりけるをよめる 春ごとにながるる河を花と見てをられぬ水に袖やぬれなむ 年をへて花のかがみとなる水はちりかかるをやくもるといふらむ 家にありける梅花のちりけるをよめる くるとあくとめかれぬものを梅花いつの人まにうつろひぬらむ 寛平御時きさいの宮の哥合のうた 梅がかをそでにうつしてとどめてば春はすぐともかたみならまし ちると見てあるべきものを梅花うたてにほひのそでにとまれる 題しらず ちりぬともかをだにのこせ梅花こひしき時のおもひいでにせむ 人の家にうゑたりけるさくらの花さきはじめたりけ るを見てよめる ことしより春しりそむるさくら花ちるといふ事はならはざらなむ 題しらず 山たかみ人もすさめぬさくら花いたくなわびそ我見はやさむ 又は、さととほみ人もすさめぬ山ざくら やまざくらわが見にくれば春霞峯にもをにもたちかくしつつ そめどののきさきのおまへに花がめにさくらの花を ささせ給へるを見てよめる 年ふればよはひはおいぬしかはあれど花をし見ればもの思ひもなし なぎさの院にてさくらを見てよめる 世中にたえてさくらのなかりせば春の心はのどけからまし 題しらず いしばしるたきなくもがな桜花たをりてもこむ見ぬ人のため 山のさくらを見てよめる 見てのみや人にかたらむさくら花てごとにをりていへづとにせむ 花ざかりに京を見やりてよめる みわたせば柳桜をこきまぜて宮こぞ春の錦なりける さくらの花のもとにて年のおいぬることをなげきて よめる いろもかもおなじむかしにさくらめど年ふる人ぞあらたまりける をれるさくらをよめる たれしかもとめてをりつる春霞たちかくすらむ山のさくらを 哥たてまつれとおほせられし時によみてたてまつれ る 桜花さきにけらしなあしひきの山のかひより見ゆる白雲 寛平御時きさいの宮の哥合のうた み吉野の山べにさけるさくら花雪かとのみぞあやまたれける やよひにうるふ月ありける年よみける さくら花春くははれる年だにも人の心にあかれやはせぬ さくらの花のさかりに、ひさしくとはざりける人の きたりける時によみける あだなりとなにこそたてれ桜花年にまれなる人もまちけり 返し けふこずはあすは雪とぞふりなましきえずはありとも花と見ましや 題しらず ちりぬればこふれどしるしなき物をけふこそさくらをらばをりてめ をりとらばをしげにもあるか桜花いざやどかりてちるまでは見む さくらいろに衣はふかくそめてきむ花のちりなむのちのかたみに さくらの花のさけりけるを見にまうできたりける人 によみておくりける わがやどの花見がてらにくる人はちりなむのちぞこひしかるべき 亭子院哥合の時よめる 見る人もなき山ざとのさくら花ほかのちりなむのちぞさかまし 
題しらず 春霞たなびく山のさくら花うつろはむとや色かはりゆく まてといふにちらでしとまる物ならばなにを桜に思ひまさまし のこりなくちるぞめでたき桜花ありて世中はてのうければ このさとにたびねしぬべしさくら花ちりのまがひにいへぢわすれて 空蝉の世にもにたるか花ざくらさくと見しまにかつちりにけり 僧正遍昭によみておくりける さくら花ちらばちらなむちらずとてふるさと人のきても見なくに 雲林院にてさくらの花のちりけるを見てよめる 桜ちる花の所は春ながら雪ぞふりつつきえがてにする さくらの花のちり侍りけるを見てよみける 花ちらす風のやどりはたれかしる我にをしへよ行きてうらみむ うりむゐんにてさくらの花をよめる いざさくら我もちりなむひとさかりありなば人にうきめ見えなむ あひしれりける人のまうできてかへりにけるのちに よみて花にさしてつかはしける ひとめ見し君もやくると桜花けふはまち見てちらばちらなむ 山のさくらを見てよめる 春霞なにかくすらむ桜花ちるまをだにも見るべき物を 心地そこなひてわづらひける時に、風にあたらじと ておろしこめてのみ侍りけるあひだに、をれるさくらのちりがたになれりけるを見てよ める たれこめて春のゆくへもしらぬまにまちし桜もうつろひにけり 東宮雅院にてさくらの花のみかは水にちりてながれ けるを見てよめる 枝よりもあだにちりにし花なればおちても水のあわとこそなれ さくらの花のちりけるをよみける ごとならばさかずやはあらぬさくら花見る我さへにしづ心なし さくらのごととくちる物はなしと人のいひければよ める さくら花とくちりぬともおもほえず人の心ぞ風も吹きあへぬ 桜の花のちるをよめる 久方のひかりのどけき春の日にしづ心なく花のちるらむ 春宮のたちはきのぢんにてさくらの花のちるをよめ る 春風は花のあたりをよきてふけ心づからやうつろふと見む さくらのちるをよめる 雪とのみふるだにあるをさくら花いかにちれとか風の吹くらむ ひえにのぼりてかへりまうできてよめる 山たかみみつつわがこしさくら花風は心にまかすべらなり 題しらず 春雨のふるは涙かさくら花ちるををしまぬ人しなければ 亭子院哥合哥 さくら花ちりぬる風のなごりには水なきそらに浪ぞたちける ならのみかどの御うた ふるさととなりにしならのみやこにも色はかはらず花はさきけり はるのうたとてよめる 花の色はかすみにこめて見せずともかをだにぬすめ春の山かぜ 寛平御時きさいの宮の哥合のうた はなの木も今はほりうゑじ春たてばうつろふ色に人ならひけり 題しらず 春の色のいたりいたらぬさとはあらじさけるさかざる花の見ゆらむ はるのうたとてよめる みわ山をしかもかくすか春霞人にしられぬ花やさくらむ うりむゐんのみこのもとに、花見にきた山のほとり にまかれりける時によめる いざけふは春の山辺にまじりなむくれなばなげの花のかげかは はるのうたとてよめる いつまでか野辺に心のあくがれむ花しちらずは千世もへぬべし 題しらず 春ごとに花のさかりはありなめどあひ見む事はいのちなりけり 花のごと世のつねならばすぐしてし昔は又もかへりきなまし 吹く風にあつらへつくる物ならばこのひともとはよぎよといはまし まつ人もこぬものゆゑにうぐひすのなきつる花ををりてけるかな 寛平御時きさいの宮のうたあはせのうた さく花は千くさながらにあだなれどたれかははるをうらみはてたる 春霞色のちくさに見えつるはたなびく山の花のかげかも 霞立つ春の山べはとほけれど吹きくる風は花のかぞする うつろへる花を見てよめる 花見れば心さへにぞうつりけるいろにはいでじ人もこそしれ 題しらず 鶯のなくのべごとにきて見ればうつろふ花に風ぞふきける 吹く風をなきてうらみよ鶯は我やは花に手だにふれたる ちる花のなくにしとまる物ならば我鶯におとらましやは 仁和の中将のみやすん所の家に哥合せむとてしける 時によみける 花のちることやわびしき春霞たつたの山のうぐひすのこゑ うぐひすのなくをよめる こづたへばおのがはかぜにちる花をたれにおほせてここらなくらむ 鶯の花の木にてなくをよめる しるしなきねをもなくかなうぐひすのことしのみちる花ならなくに 題しらず こまなめていざ見にゆかむふるさとは雪とのみこそ花はちるらめ ちる花をなにかうらみむ世中にわが身もともにあらむ物かは 花の色はうつりにけりないたづらにわが身世にふるながめせしまに 仁和の中将のみやすん所の家に哥合せむとしける時 によめる をしと思ふ心はいとによられなむちる花ごとにぬきてとどめむ しがの山ごえに女のおほくあへりけるに、よみてつ かはしける あづさゆみはるの山辺をこえくれば道もさりあへず花ぞちりける 寛平御時きさいの宮の哥合のうた 春ののにわかなつまむとこしものをちりかふ花にみちはまどひぬ 山でらにまうでたりけるによめる やどりして春の山辺にねたる夜は夢の内にも花ぞちりける 寛平御時きさいの宮の哥合のうた 吹く風と谷の水としなかりせばみ山がくれの花を見ましや しがよりかへりけるをうなどもの花山にいりて ふぢの花のもとにたちよりてかへりけるに、よみておくりける よそに見てかへらむ人にふぢの花はひまつはれよえだはをるとも 家にふぢの花のさけりけるを、人のたちとまりて見 けるをよめる わがやどにさける藤波たちかへりすぎがてにのみ人の見るらむ 題しらず 今もかもさきにほふらむ橘のこじまのさきの山吹の花 春雨ににほへる色もあかなくにかさへなつかし山吹の花 山ぶきはあやななさきそ花見むとうゑけむ君がこよひこなくに よしの河のほとりに山ぶきのさけりけるをよめる 吉野河岸の山吹ふくかぜにそこの影さへうつろひにけり 題しらず かはづなくゐでの山吹ちりにけり花のさかりにあはまし物を この哥は、ある人のいはく、たちばなのきよとも が哥なり 春の哥とてよめる おもふどち春の山辺にうちむれてそこともいはぬたびねしてしか はるのとくすぐるをよめる あづさゆみ春たちしより年月のいるがごとくもおもほゆるかな やよひにうぐひすのこゑのひさしうきこえざりける をよめる なきとむる花しなければうぐひすもはては物うくなりぬべらなり やよひのつごもりがたに山をこえけるに、山河より 花のながれけるをよめる 花ちれる水のまにまにとめくれば山には春もなくなりにけり はるををしみてよめる をしめどもとどまらなくに春霞かへる道にしたちぬとおもへば 寛平御時きさいの宮の哥合のうた こゑたえずなけやうぐひすひととせにふたたびとだにくべき春かは やよひのつごもりの日、花つみよりかへりける女 どもを見てよめる とどむべき物とはなしにはかなくもちる花ごとにたぐふこころか やよひのつごもりの日あめのふりけるに、ふぢの花 ををりて人につかはしける ぬれつつぞしひてをりつる年の内に春はいくかもあらじと思へば 亭子院の哥合のはるのはてのうた けふのみと春をおもはぬ時だにも立つことやすき花のかげかは 
題しらず わがやどの池の藤波さきにけり山郭公いつかきなかむ このうた、ある人のいはく、かきのもとの人まろが 也 う月にさけるさくらを見てよめる あはれてふ事をあまたにやらじとや春におくれてひとりさくらむ 題しらず さ月まつ山郭公うちはぶき今もなかなむこぞのふるごゑ 五月こばなきもふりなむ郭公まだしきほどのこゑをきかばや さつきまつ花橘のかをかげば昔の人の袖のかぞする いつのまにさ月きぬらむあしひきの山郭公今ぞなくなる けさきなきいまだたびなる郭公花たちばなにやどはからなむ おとは山をこえける時に郭公のなくをききてよめる おとは山けさこえくれば郭公こずゑはるかに今ぞなくなる 郭公のはじめてなきけるをききてよめる 郭公はつこゑきけばあぢきなくぬしさだまらぬこひせらるはた ならのいその神でらにて郭公のなくをよめる いその神ふるき宮この郭公声ばかりこそむかしなりけれ 題しらず 夏山になく郭公心あらば物思ふ我に声なきかせそ 郭公なくこゑきけばわかれにしふるさとさへぞこひしかりける ほととぎすながなくさとのあまたあれば猶うとまれぬ思ふ物から 思ひいづるときはの山の郭公唐紅のふりいでてぞなく 声はして涙は見えぬ郭公わが衣手のひつをからなむ あしひきの山郭公をりはへてたれかまさるとねをのみぞなく 今さらに山へかへるな郭公こゑのかぎりはわがやどになけ やよやまて山郭公事づてむ我世中にすみわびぬとよ 寛平御時きさいの宮の哥合のうた 五月雨に物思ひをれば郭公夜ふかくなきていづちゆくらむ 夜やくらき道やまどへるほととぎすわがやどをしもすぎがてになく やどりせし花橘もかれなくになどほととぎすこゑたえぬらむ 夏の夜のふすかとすれば郭公なくひとこゑにあくるしののめ くるるかと見ればあけぬるなつのよをあかずとやなく山郭公 夏山にこひしき人やいりにけむ声ふりたててなく郭公 題しらず こぞの夏なきふるしてし郭公それかあらぬかこゑのかはらぬ 郭公のなくをききてよめる 五月雨のそらもとどろに郭公なにをうしとかよただなくらむ さぶらひにてをのこどものさけたうべけるに、めし て郭公まつうたよめとありければよめる ほととぎすこゑもきこえず山びこはほかになくねをこたへやはせぬ 山に郭公のなきけるをききてよめる 郭公人まつ山になくなれば我うちつけにこひまさりけり はやくすみける所にてほととぎすのなきけるを ききてよめる むかしべや今もこひしき郭公ふるさとにしもなきてきつらむ 郭公のなきけるをききてよめる 郭公我とはなしに卯花のうき世中になきわたるらむ はちすのつゆを見てよめる はちすばのにごりにしまぬ心もてなにかはつゆを玉とあざむく 月のおもしろかりける夜、あかつきがたによめる 夏の夜はまだよひながらあけぬるを雲のいづこに月やどるらむ となりよりとこなつの花をこひにおこせたりけれ ば、をしみてこのうたをよみてつかはしける ちりをだにすゑじとぞ思ふさきしよりいもとわがぬるとこ夏のはな みな月のつごもりの日よめる 夏と秋と行きかふそらのかよひぢはかたへすずしき風やふくらむ 
秋立つ日よめる あききぬとめにはさやかに見えねども風のおとにぞおどろかれぬる 秋たつ日、うへのをのこどもかものかはらにかはせ うえうしけるともにまかりてよめる 河風のすずしくもあるかうちよする浪とともにや秋は立つらむ 題しらず わがせこが衣のすそを吹き返しうらめづらしき秋のはつ風 きのふこそさなへとりしかいつのまにいなばそよぎて秋風の吹く 秋風の吹きにし日より久方のあまのかはらにたたぬ日はなし 久方のあまのかはらのわたしもり君わたりなばかぢかくしてよ 天河紅葉をはしにわたせばやたなばたつめの秋をしもまつ こひこひてあふ夜はこよひあまの河きり立ちわたりあけずもあらなむ 寛平御時なぬかの夜、うへにさぶらふをのこども、 哥たてまつれとおほせられける時に、人にかはりてよめる 天河あさせしら浪たどりつつわたりはてねばあけぞしにける おなじ御時きさいの宮の哥合のうた 契りけむ心ぞつらきたなばたの年にひとたびあふはあふかは なぬかの日の夜よめる> 年ごとにあふとはすれどたなばたのぬるよのかずぞすくなかりける 織女にかしつる糸の打ちはへて年のをながくこひやわたらむ 題しらず こよひこむ人にはあはじたなばたのひさしきほどにまちもこそすれ なぬかの夜のあかつきによめる 今はとてわかるる時は天河わたらぬさきにそでぞひちぬる やうかの日よめる けふよりはいまこむ年のきのふをぞいつしかとのみまちわたるべき 題しらず このまよりもりくる月の影見れば心づくしの秋はきにけり おほかたの秋くるからにわが身こそかなしき物と思ひしりぬれ わがためにくる秋にしもあらなくにむしのねきけばまづぞかなしき 物ごとに秋ぞかなしきもみぢつつうつろひゆくをかぎりと思へば ひとりぬるとこは草ばにあらねども秋くるよひはつゆけかりけり これさだのみこの家の哥合のうた いつはとは時はわかねど秋のよぞ物思ふ事のかぎりなりける かむなりのつぼに人人あつまりて秋のよをしむ哥よ みけるついでによめる かくばかりをしと思ふ夜をいたづらにねてあかすらむ人さへぞうき 題しらず 白雲にはねうちかはしとぶかりのかずさへ見ゆる秋のよの月 さ夜なかと夜はふけぬらしかりがねのきこゆるそらに月わたる見ゆ これさだのみこの家の哥合によめる 月見れはちぢに物こそかなしけれわが身ひとつの秋にはあらねど 久方の月の桂も秋は猶もみぢすればやてりまさるらむ 月をよめる 秋の夜の月のひかりしあかければくらぶの山もこえぬべらなり 人のもとにまかれりける夜、きりぎりすのなきける をききてよめる 蟋蟀いたくななきそ秋の夜の長き思ひは我ぞまされる これさだのみこの家の哥合のうた 秋の夜のあくるもしらずなくむしはわがごと物やかなしかるらむ 題しらず あき萩も色づきぬればきりぎりすわがねぬごとやよるはかなしき 秋の夜はつゆこそことにさむからし草むらごとにむしのわぶれば 君しのぶ草にやつるるふるさとは松虫のねぞかなしかりける 秋ののに道もまどひぬ松虫のこゑする方にやどやからまし あきののに人松虫のこゑすなり我かとゆきていざとぶらはむ もみぢばのちりてつもれるわがやどに誰を松虫ここらなくらむ ひぐらしのなきつるなへに日はくれぬと思ふは山のかげにぞありける ひぐらしのなく山里のゆふぐれは風よりほかにとふ人もなし はつかりをよめる まつ人にあらぬ物からはつかりのけさなくこゑのめづらしきかな これさだのみこの家の哥合のうた 秋風にはつかりがねぞきこゆなるたがたまづさをかけてきつらむ 題しらず わがかどにいなおほせどりのなくなへにけさ吹く風にかりはきにけり いとはやもなきぬるかりか白露のいろどる木木ももみぢあへなくに 春霞かすみていにしかりがねは今ぞなくなる秋ぎりのうへに 夜をさむみ衣かりがねなくなへに萩のしたばもうつろひにけり このうたはある人のいはく、柿本の人まろが也と 寛平御時きさいの宮の哥合のうた 秋風にこゑをほにあげてくる舟はあまのとわたるかりにぞありける かりのなきけるをききてよめる うき事を思ひつらねてかりがねのなきこそわたれ秋のよなよな これさだのみこの家の哥合のうた 山里は秋こそことにわびしけれしかのなくねにめをさましつつ おく山に紅葉ふみわけなく鹿のこゑきく時ぞ秋は悲しき 題しらず 秋はぎにうらびれをればあしひきの山したとよみしかのなくらむ 秋はぎをしがらみふせてなくしかのめには見えずておとのさやけさ これさだのみこの家の哥合によめる あきはぎの花さきにけり高砂のをのへのしかは今やなくらむ むかしあひしりて侍りける人の、秋ののにあひて物 がたりしけるついでによめる 秋はぎのふるえにさける花見れば本の心はわすれざりけり 題しらず あきはぎのしたば色づく今よりやひとりある人のいねがてにする なきわたるかりの涙やおちつらむ物思ふやどの萩のうへのつゆ 萩の露玉にぬかむととればけぬよし見む人は枝ながら見よ ある人のいはく、この哥はならのみかどの御哥なり と をりて見ばおちぞしぬべき秋はぎの枝もとををにおけるしらつゆ 萩が花ちるらむをののつゆしもにぬれてをゆかむさ夜はふくとも 是貞のみこの家の哥合によめる 秋ののにおくしらつゆは玉なれやつらぬきかくるくものいとすぢ 題しらず 名にめでてをれるばかりぞをみなへし我おちにきと人にかたるな 僧正遍昭がもとにならへまかりける時に、をとこ山 にてをみなへしを見てよめる をみなへしうしと見つつぞゆきすぐるをとこ山にしたてりと思へば 是貞のみこの家の哥合のうた 秋ののにやどりはすべしをみなへし名をむつまじみたびならなくに 題しらず をみなへしおほかるのべにやどりせばあやなくあだの名をやたちなむ 朱雀院のをみなへしあはせによみてたてまつりける をみなへし秋のの風にうちなびき心ひとつをたれによすらむ 秋ならであふことかたきをみなへしあまのかはらにおひぬものゆゑ たが秋にあらぬものゆゑをみなへしなぞ色にいでてまだきうつろふ つまこふるしかぞなくなる女郎花おのがすむのの花としらずや 女郎花ふきすぎてくる秋風はめには見えねどかこそしるけれ 人の見る事やくるしきをみなへし秋ぎりにのみたちかくるらむ ひとりのみながむるよりは女郎花わがすむやどにうゑて見ましを ものへまかりけるに、人の家にをみなへしうゑたり けるを見てよめる をみなへしうしろめたくも見ゆるかなあれたるやどにひとりたてれば 寛平御時、蔵人所のをのこどもさがのに花見むとてまかりたりける時、かへるとてみな哥よみけるついでによめる 花にあかでなにかへるらむをみなへしおほかるのべにねなましものを これさだのみこの家の哥合によめる なに人かきてぬぎかけしふぢばかまくる秋ごとにのべをにほはす ふぢばかまをよみて人につかはしける やどりせし人のかたみかふぢばかまわすられがたきかににほひつつ ふぢばかまをよめる ぬししらぬかこそにほへれ秋ののにたがぬぎかけしふぢばかまぞも 題しらず 今よりはうゑてだに見じ花すすきほにいづる秋はわびしかりけり 寛平御時きさいの宮の哥合のうた 秋の野の草のたもとか花すすきほにいでてまねく袖と見ゆらむ 我のみやあはれとおもはむきりぎりすなくゆふかげのやまとなでしこ 題しらず みどりなるひとつ草とぞ春は見し秋はいろいろの花にぞありける ももくさの花のひもとく秋ののを思ひたはれむ人なとがめそ 月草に衣はすらむあさつゆにぬれてののちはうつろひぬとも 仁和のみかどみこにおはしましける時、ふるのた き御覧ぜむとておはしましけるみちに、遍昭がははの家にやどりたまへりける時に、 庭を秋ののにつくりて、おほむ物がたりのついでによみてたてまつりける さとはあれて人はふりにしやどなれや庭もまがきも秋ののらなる 
これさだのみこの家の哥合のうた 吹くからに秋の草木のしをるればむべ山かぜをあらしといふらむ 草も木も色かはれどもわたつうみの浪の花にぞ秋なかりける 秋の哥合しける時によめる 紅葉せぬときはの山は吹く風のおとにや秋をききわたるらむ 題しらず 霧立ちて雁ぞなくなる片岡の朝の原は紅葉しぬらむ 神な月時雨もいまだふらなくにかねてうつろふ神なびのもり ちはやぶる神なび山のもみぢばに思ひはかけじうつろふ物を 貞観御時、綾綺殿のまへに梅の木ありけり、にしの 方にさせりけるえだのもみぢはじめたりけるを、うへにさぶらふをのこどものよみける ついでによめる おなじえをわきてこのはのうつろふは西こそ秋のはじめなりけれ いしやまにまうでける時、おとは山のもみぢを見て よめる 秋風のふきにし日よりおとは山峯のこずゑも色づきにけり これさだのみこの家の哥合によめる 白露の色はひとつをいかにして秋のこのはをちぢにそむらむ 秋の夜のつゆをばつゆとおきながらかりの涙やのべをそむらむ 題しらず あきのつゆいろいろごとにおけばこそ山のこのはのちくさなるらめ もる山のほとりにてよめる しらつゆも時雨もいたくもる山はしたばのこらず色づきにけり 秋のうたとてよめる 雨ふれどつゆももらじをかさとりの山はいかでかもみぢそめけむ 神のやしろのあたりをまかりける時にいがきのうち のもみぢを見てよめる ちはやぶる神のいがきにはふくずも秋にはあへずうつろひにけり これさだのみこの家の哥合によめる あめふればかさとり山のもみぢばはゆきかふ人のそでさへぞてる 寛平御時きさいの宮の哥合のうた ちらねどもかねてぞをしきもみぢばは今は限の色と見つれば やまとのくににまかりける時、さほ山にきりのたて りけるを見てよめる たがための錦なればか秋ぎりのさほの山辺をたちかくすらむ 是貞のみこの家の哥合のうた 秋ぎりはけさはなたちそさほ山のははそのもみぢよそにても見む 秋のうたとてよめる 佐保山のははその色はうすけれど秋は深くもなりにけるかな 人のせんざいにきくにむすびつけてうゑけるうた うゑしうゑば秋なき時やさかざらむ花こそちらめねさへかれめや 寛平御時きくの花をよませたまうける 久方の雲のうへにて見る菊はあまつほしとぞあやまたれける この哥は、まだ殿上ゆるされざりける時にめしあげ られてつかうまつれるとなむ これさだのみこの家の哥合のうた 露ながらをりてかざさむきくの花おいせぬ秋のひさしかるべく 寛平御時きさいの宮の哥合のうた うゑし時花まちどほにありしきくうつろふ秋にあはむとや見し おなじ御時せられけるきくあはせに、すはまをつく りて菊の花うゑたりけるにくはへたりけるうた、ふきあげのはまのかたにきくうゑたり けるによめる 秋風の吹きあげにたてる白菊は花かあらぬか浪のよするか 仙宮に菊をわけて人のいたれるかたをよめる ぬれてほす山ぢの菊のつゆのまにいつかちとせを我はへにけむ 菊の花のもとにて人の人まてるかたをよめる 花見つつ人まつ時はしろたへの袖かとのみぞあやまたれける おほさはの池のかたにきくうゑたるをよめる ひともとと思ひしきくをおほさはの池のそこにもたれかうゑけむ 世中のはかなきことを思ひけるをりにきくの花を見 てよみける 秋の菊にほふかぎりはかざしてむ花よりさきとしらぬわが身を しらぎくの花をよめる 心あてにをらばやをらむはつしものおきまどはせる白菊の花 これさだのみこの家の哥合のうた いろかはる秋のきくをばひととせにふたたびにほふ花とこそ見れ 仁和寺にきくのはなめしける時に、うたそへてたて まつれとおほせられければ、よみてたてまつりける 秋をおきて時こそ有りけれ菊の花うつろふからに色のまされば 人の家なりけるきくの花をうつしうゑたりけるをよ める さきそめしやどしかはれば菊の花色さへにこそうつろひにけれ 題しらず 佐保山のははそのもみぢちりぬべみよるさへ見よとてらす月影 みやづかへひさしうつかうまつらで山ざとにこもり 侍りけるによめる おく山のいはがきもみぢちりぬべしてる日のひかり見る時なくて 題しらず 竜田河もみぢみだれて流るめりわたらば錦なかやたえなむ この哥は、ある人、ならのみかどの御哥なりとなむ 申す たつた河もみぢば流る神なびのみむろの山に時雨ふるらし 又は、あすかがはもみぢばながる こひしくは見てもしのばむもみぢばを吹きなちらしそ山おろしのかぜ 秋風にあへずちりぬるもみぢばのゆくへさだめぬ我ぞかなしき あきはきぬ紅葉はやどにふりしきぬ道ふみわけてとふ人はなし ふみわけてさらにやとはむもみぢばのふりかくしてしみちとみながら 秋の月山辺さやかにてらせるはおつるもみぢのかずを見よとか 吹く風の色のちくさに見えつるは秋のこのはのちればなりけり
霜のたてつゆのぬきこそよわからし山の錦のおればかつちる うりむゐんの木のかげにたたずみてよみける わび人のわきてたちよるこの本はたのむかげなくもみぢちりけり 二条の后の春宮のみやす所と申しける時に、御屏風 にたつた河にもみぢながれたるかたをかけりけるを題にてよめる もみぢばのながれてとまるみなとには紅深き浪や立つらむ ちはやぶる神世もきかず竜田河唐紅に水くくるとは これさだのみこの家の哥合のうた わがきつる方もしられずくらぶ山木木のこのはのちるとまがふに 神なびのみむろの山を秋ゆけば錦たちきる心地こそすれ 北山に紅葉をらむとてまかれりける時によめる 見る人もなくてちりぬるおく山の紅葉はよるのにしきなりけり 秋のうた 竜田ひめたむくる神のあればこそ秋のこのはのぬさとちるらめ をのといふ所にすみ侍りける時もみぢを見てよめる 秋の山紅葉をぬさとたむくればすむ我さへぞたび心ちする 神なびの山をすぎて竜田河をわたりける時に、もみ ぢのながれけるをよめる 神なびの山をすぎ行く秋なればたつた河にぞぬさはたむくる 寛平御時きさいの宮の哥合のうた 白浪に秋のこのはのうかべるをあまのながせる舟かとぞ見る たつた河のほとりにてよめる もみぢばのながれざりせば竜田河水の秋をばたれかしらまし しがの山ごえにてよめる 山河に風のかけたるしがらみは流れもあへぬ紅葉なりけり 池のほとりにてもみぢのちるをよめる 風ふけばおつるもみぢば水きよみちらぬかげさへそこに見えつつ 亭子院の御屏風のゑに、河わたらむとする人のもみ ぢのちる木のもとにむまをひかへてたてるをよませたまひければつかうまつりける 立ちとまり見てをわたらむもみぢばは雨とふるとも水はまさらじ 是貞のみこの家の哥合のうた 山田もる秋のかりいほにおくつゆはいなおほせ鳥の涙なりけり 題しらず ほにもいでぬ山田をもると藤衣いなばのつゆにぬれぬ日ぞなき かれる田におふるひつちのほにいでぬは世を今更に秋はてぬとか 北山に僧正へんぜうとたけがりにまかれりけるによ める もみぢばは袖にこきいれてもていでなむ秋は限と見む人のため 寛平御時ふるきうたたてまつれとおほせられけれ ば、たつた河もみぢばながるといふ哥をかきて、そのおなじ心をよめりける み山よりおちくる水の色見てぞ秋は限と思ひしりぬる 秋のはつる心をたつた河に思ひやりてよめる 年ごとにもみぢばながす竜田河みなとや秋のとまりなるらむ なが月のつごもりの日大井にてよめる ゆふづく夜をぐらの山になくしかのこゑの内にや秋はくるらむ おなじつごもりの日よめる 道しらばたづねもゆかむもみぢばをぬさとたむけて秋はいにけり 
題しらず 竜田河錦おりかく神な月しぐれの雨をたてぬきにして 冬の哥とてよめる 山里は冬ぞさびしさまさりける人めも草もかれぬと思へば 題しらず おほぞらの月のひかりしきよければ影見し水ぞまづこほりける ゆふされば衣手さむしみよしののよしのの山にみ雪ふるらし 今よりはつぎてふらなむわがやどのすすきおしなみふれるしら雪 ふる雪はかつぞけぬらしあしひきの山のたぎつせおとまさるなり この河にもみぢば流るおく山の雪げの水ぞ今まさるらし ふるさとはよしのの山しちかければひと日もみ雪ふらぬ日はなし わがやどは雪ふりしきてみちもなしふみわけてとふ人しなければ 冬のうたとて 雪ふれば冬ごもりせる草も木も春にしられぬ花ぞさきける しがの山ごえにてよめる 白雪のところもわかずふりしけばいはほにもさく花とこそ見れ ならの京にまかれりける時にやどれりける所にてよ める みよしのの山の白雪つもるらしふるさとさむくなりまさるなり 寛平御時きさいの宮の哥合のうた 浦ちかくふりくる雪は白浪の末の松山こすかとぞ見る みよしのの山の白雪ふみわけて入りにし人のおとづれもせぬ 白雪のふりてつもれる山ざとはすむ人さへや思ひきゆらむ 雪のふれるを見てよめる ゆきふりて人もかよはぬみちなれやあとはかもなく思ひきゆらむ ゆきのふりけるをよみける 冬ながらそらより花のちりくるは雲のあなたは春にやあるらむ 雪の木にふりかかれりけるをよめる ふゆごもり思ひかけぬをこのまより花と見るまで雪ぞふりける やまとのくににまかれりける時に、ゆきのふりける を見てよめる あさぼらけありあけの月と見るまでによしののさとにふれるしらゆき 題しらず けぬがうへに又もふりしけ春霞たちなばみ雪まれにこそ見め 梅花それとも見えず久方のあまぎる雪のなべてふれれば この哥は、ある人のいはく、柿本人まろが哥なり 梅花にゆきのふれるをよめる 花の色は雪にまじりて見えずともかをだににほへ人のしるべく 雪のうちの梅花をよめる 梅のかのふりおける雪にまがひせばたれかことごとわきてをらまし ゆきのふりけるを見てよめる 雪ふれば木ごとに花ぞさきにけるいづれを梅とわきてをらまし 物へまかりける人をまちてしはすのつごもりによめ る わがまたぬ年はきぬれど冬草のかれにし人はおとづれもせず 年のはてによめる あらたまの年のをはりになるごとに雪もわが身もふりまさりつつ 寛平御時きさいの宮の哥合のうた 雪ふりて年のくれぬる時こそつひにもみぢぬ松も見えけれ 年のはてによめる 昨日といひけふとくらしてあすかがは流れてはやき月日なりけり 哥たてまつれとおほせられし時によみてたてまつれ る ゆく年のをしくもあるかなますかがみ見るかげさへにくれぬと思へば 
題しらず わが君は千世にやちよにさざれいしのいはほとなりてこけのむすまで 渡つ海の浜のまさごをかぞへつつ君がちとせのありかずにせむ しほの山さしでのいそにすむ千鳥きみがみ世をばやちよとぞなく わがよはひ君がやちよにとりそへてとどめおきては思ひいでにせよ 仁和の御時僧正遍昭に七十賀たまひける時の御哥 かくしつつとにもかくにもながらへて君がやちよにあふよしもがな 仁和のみかどのみこにおはしましける時に、御をば のやそぢの賀にしろかねをつゑにつくれりけるを見て、かの御をばにかはりてよみける ちはやぶる神やきりけむつくからにちとせの坂もこえぬべらなり ほりかはのおほいまうちぎみの四十賀、九条の家に てしける時によめる さくら花ちりかひくもれおいらくのこむといふなる道まがふがに さだときのみこのをばのよそぢの賀を大井にてしけ る日よめる 亀の尾の山のいはねをとめておつるたきの白玉千世のかずかも さだやすのみこのきさいの宮の五十の賀たてまつり ける御屏風に、さくらの花のちるしたに人の花見たるかたかけるをよめる いたづらにすぐす月日はおもほえで花見てくらす春ぞすくなき もとやすのみこの七十の賀のうしろの屏風によみて かきける 春くればやどにまづさく梅花君がちとせのかざしとぞ見る いにしへにありきあらずはしらねどもちとせのためし君にはじめむ ふしておもひおきてかぞふるよろづよは神ぞしるらむわがきみのため 藤原三善が六十賀によみける 鶴亀もちとせののちはしらなくにあかぬ心にまかせはててむ この哥は、ある人、在原のときはるがともいふ よしみねのつねなりがよそぢの賀にむすめにかはり てよみ侍りける よろづ世を松にぞ君をいはひつるちとせのかげにすまむと思へば 内侍のかみの右大将ふぢはらの朝臣の四十賀しける 時に、四季のゑかけるうしろの屏風にかきたりけるうた かすがのにわかなつみつつよろづ世をいはふ心は神ぞしるらむ 山たかみくもゐに見ゆるさくら花心の行きてをらぬ日ぞなき 夏 めづらしきこゑならなくに郭公ここらの年をあかずもあるかな 秋 住の江の松を秋風吹くからにこゑうちそふるおきつ白浪 千鳥なくさほの河ぎりたちぬらし山のこのはも色まさりゆく 秋くれど色もかはらぬときは山よそのもみぢを風ぞかしける 冬 白雪のふりしく時はみよしのの山した風に花ぞちりける 春宮のむまれたまへりける時にまゐりてよめる 峯たかきかすがの山にいづる日はくもる時なくてらすべらなり 
題しらず 立ちわかれいなばの山の峯におふる松としきかば今かへりこむ すがるなく秋のはぎはらあさたちて旅行く人をいつとかまたむ 限なき雲ゐのよそにわかるとも人を心におくらさむやは をののちふるがみちのくのすけにまかりける時に、 ははのよめる たらちねのおやのまもりとあひそふる心ばかりはせきなとどめそ さだときのみこの家にて、ふぢはらのきよふがあふ みのすけにまかりける時に、むまのはなむけしける夜よめる けふわかれあすはあふみとおもへども夜やふけぬらむ袖のつゆけき こしへまかりける人によみてつかはしける かへる山ありとはきけど春霞立別れなばこひしかるべし 人のむまのはなむけにてよめる をしむからこひしき物を白雲のたちなむのちはなに心地せむ ともだちの人のくにへまかりけるによめる わかれてはほどをへだつとおもへばやかつ見ながらにかねてこひしき あづまの方へまかりける人によみてつかはしける おもへども身をしわけねばめに見えぬ心を君にたぐへてぞやる あふさかにて人をわかれける時によめる 相坂の関しまさしき物ならばあかずわかるる君をとどめよ 題しらず 唐衣たつ日はきかじあさつゆのおきてしゆけばけぬべき物を このうたは、ある人、つかさをたまはりてあたらし きめにつきて、としへてすみける人をすてて、ただあすなむたつとばかりいへりける時 に、ともかうもいはでよみてつかはしける ひたちへまかりける時に、ふぢはらのきみとしによ みてつかはしける あさなげに見べききみとしたのまねば思ひたちぬる草枕なり きのむねさだがあづまへまかりける時に、人の家に やどりて、暁いでたつとてまかり申ししければ、女のよみていだせりける えぞしらぬ今心みよいのちあらば我やわするる人やとはぬと あひしりて侍りける人のあづまの方へまかりけるを おくるとてよめる 雲ゐにもかよふ心のおくれねばわかると人に見ゆばかりなり とものあづまへまかりける時によめる 白雲のこなたかなたに立ちわかれ心をぬさとくだくたびかな みちのくにへまかりける人によみてつかはしける しらくものやへにかさなるをちにてもおもはむ人に心へだつな 人をわかれける時によみける わかれてふ事はいろにもあらなくに心にしみてわびしかるらむ あひしれりける人のこしのくににまかりて、としへ て京にまうできて、又かへりける時によめる かへる山なにぞはありてあるかひはきてもとまらぬ名にこそありけれ こしのくにへまかりける人によみてつかはしける よそにのみこひやわたらむしら山の雪見るべくもあらぬわが身は おとはの山のほとりにて人をわかるとてよめる おとは山こだかくなきて郭公君が別ををしむべらなり 藤原ののちかげがからもののつかひに、なが月の つごもりがたにまかりけるに、うへのをのこどもさけたうびけるついでによめる もろともになきてとどめよ蛬秋のわかれはをしくやはあらぬ 秋霧のともにたちいでてわかれなばはれぬ思ひに恋ひや渡らむ 源のさねがつくしへゆあみむとてまかりけるに、山 ざきにてわかれをしみける所にてよめる いのちだに心にかなふ物ならばなにか別のかなしからまし 山ざきより神なびのもりまでおくりに人人まかり て、かへりがてにしてわかれをしみけるによめる 人やりの道ならなくにおほかたはいきうしといひていざ帰りなむ 今はこれよりかへりねとさねがいひけるをりによみ ける したはれてきにし心の身にしあれば帰るさまには道もしられず 藤原のこれをかがむさしのすけにまかりける時に、 おくりにあふさかをこゆとてよみける かつこえてわかれもゆくかあふさかは人だのめなる名にこそありけれ おほえのちふるがこしへまかりけるむまのはなむけ によめる 君がゆくこしのしら山しらねども雪のまにまにあとはたづねむ 人の花山にまうできて、ゆふさりつかたかへりなむ としける時によめる ゆふぐれのまがきは山と見えななむよるはこえじとやどりとるべく 山にのぼりてかへりまうできて、人人わかれけるつ いでによめる 別をば山のさくらにまかせてむとめむとめじは花のまにまに うりむゐんのみこの舎利会に山にのぼりてかへりけ るに、さくらの花のもとにてよめる 山かぜにさくらふきまきみだれなむ花のまぎれにたちとまるべく ことならば君とまるべくにほはなむかへすは花のうきにやはあらぬ 仁和のみかどみこにおはしましける時に、ふるのた き御覧じにおはしましてかへりたまひけるによめる あかずしてわかるる涙滝にそふ水まさるとやしもは見るらむ かむなりのつぼにめしたりける日、おほみきなどた うべてあめのいたくふりければ、ゆふさりまで侍りてまかりいでけるをりに、さか月を とりて 秋はぎの花をば雨にぬらせども君をばましてをしとこそおもへ とよめりけるかへし をしむらむ人の心をしらぬまに秋の時雨と身ぞふりにける かねみのおほきみにはじめて物がたりして、わかれ ける時によめる わかるれどうれしくもあるかこよひよりあひ見ぬさきになにをこひまし 題しらず あかずしてわかるるそでのしらたまを君がかたみとつつみてぞ行く 限なく思ふ涙にそほちぬる袖はかわかじあはむ日までに かきくらしごとはふらなむ春雨にぬれぎぬきせて君をとどめむ しひて行く人をとどめむ桜花いづれを道と迷ふまでちれ しがの山ごえにて、いしゐのもとにてものいひける 人のわかれけるをりによめる むすぶてのしづくににごる山の井のあかでも人にわかれぬるかな みちにあへりける人のくるまにものをいひつきて、 わかれける所にてよめる したのおびのみちはかたがたわかるとも行きめぐりてもあはむとぞ思ふ 
もろこしにて月を見てよみける あまの原ふりさけ見ればかすがなるみかさの山にいでし月かも この哥は、むかしなかまろをもろこしにものならは しにつかはしたりけるに、あまたのとしをへてえかへりまうでこざりけるを、このくに より又つかひまかりいたりけるにたぐひて、まうできなむとていでたちけるに、めいし うといふ所のうみべにてかのくにの人むまのはなむけしけり、よるになりて月のいとお もしろくさしいでたりけるを見てよめるとなむかたりつたふる おきのくににながされける時に、舟にのりていでた つとて、京なる人のもとにつかはしける わたのはらやそしまかけてこぎいでぬと人にはつげよあまのつり舟 題しらず 都いでて今日みかの原いづみ河かは風さむし衣かせ山 ほのぼのと明石の浦の朝霧に島がくれ行く舟をしぞ思ふ このうたは、ある人のいはく、柿本人麿が哥也 あづまの方へ友とする人ひとりふたりいざなひてい きけり、みかはのくにやつはしといふ所にいたりけるに、その河のほとりにかきつばた いとおもしろくさけりけるを見て、木のかげにおりゐて、かきつばたといふいつもじを くのかしらにすゑてたびの心をよまむとてよめる 唐衣きつつなれにしつましあればはるばるきぬるたびをしぞ思ふ むさしのくにとしもつふさのくにとの中にあるすみ だ河のほとりにいたりて、みやこのいとこひしうおぼえければ、しばし河のほとりにお りゐて思ひやれば、かぎりなくとほくもきにけるかなと思ひわびてながめをるに、わた しもりはや舟にのれ、日くれぬといひければ、舟にのりてわたらむとするに、みな人も のわびしくて京におもふ人なくしもあらず、さるをりにしろきとりのはしとあしとあか き、河のほとりにあそびけり、京には見えぬとりなりければみな人見しらず、わたしも りにこれはなにとりぞととひければ、これなむみやこどりといひけるをききてよめる 名にしおはばいざ事とはむ宮こどりわが思ふ人はありやなしやと 題しらず 北へ行くかりぞなくなるつれてこしかずはたらでぞかへるべらなる このうたは、ある人、をとこ女もろともに人のくに へまかりけり、をとこまかりいたりてすなはち身まかりにければ、女ひとり京へかへり けるみちに、かへるかりのなきけるをききてよめるとなむいふ あづまの方より京へまうでくとて、みちにてよめる 山かくす春の霞ぞうらめしきいづれみやこのさかひなるらむ こしのくにへまかりける時しら山を見てよめる きえはつる時しなければこしぢなる白山の名は雪にぞありける あづまへまかりける時みちにてよめる いとによる物ならなくにわかれぢの心ぼそくもおもほゆるかな かひのくにへまかりける時みちにてよめる 夜をさむみおくはつ霜をはらひつつ草の枕にあまたたびねぬ たじまのくにのゆへまかりける時に、ふたみのうら といふ所にとまりて、ゆふさりのかれいひたうべけるに、ともにありける人人のうたよ みけるついでによめる ゆふづくよおぼつかなきを玉匣ふたみの浦は曙てこそ見め これたかのみこのともにかりにまかりける時に、あ まの河といふ所の河のほとりにおりゐてさけなどのみけるついでに、みこのいひけら く、かりしてあまのかはらにいたるといふ心をよみて、さかづきはさせといひければよ める かりくらしたなばたづめにやどからむあまのかはらに我はきにけり みここのうたを返す返すよみつつ返しえせずなりに ければ、ともに侍りてよめる ひととせにひとたびきます君まてばやどかす人もあらじとぞ思ふ 朱雀院のならにおはしましたりける時にたむけ山に てよみける このたびはぬさもとりあへずたむけ山紅葉の錦神のまにまに たむけにはつづりの袖もきるべきにもみぢにあける神やかへさむ 
うぐひす 心から花のしづくにそほちつつうくひずとのみ鳥のなくらむ ほととぎす くべきほどときすぎぬれやまちわびてなくなるこゑの人をとよむる うつせみ 浪のうつせみればたまぞみだれけるひろはばそでにはかなからむや 返し たもとよりはなれて玉をつつまめやこれなむそれとうつせ見むかし うめ あなうめにつねなるべくも見えぬかなこひしかるべきかはにほひつつ かにはざくら かづけども浪のなかにはさぐられで風吹くごとにうきしづむたま すもものはな 今いくか春しなければうぐひすもものはながめて思ふべらなり からもものはな あふからもものはなほこそかなしけれわかれむ事をかねて思へば たちばな 葦引の山たちはなれ行く雲のやどりさだめぬ世にこそ有りけれ をがたまの木 みよしののよしののたきにうかびいづるあわをかたまのきゆと見つらむ やまがきの木 秋はきぬいまやまがきのきりぎりすよなよななかむ風のさむさに あふひ、かつら かくばかりあふ日のまれになる人をいかがつらしとおもはざるべき 人めゆゑのちにあふ日のはるけくはわがつらきにや思ひなされむ くたに ちりぬればのちはあくたになる花を思ひしらずもまどふてふかな さうび 我はけさうひにぞ見つる花の色をあだなる物といふべかりけり をみなへし 白露を玉にぬくやとささがにの花にも葉にもいとをみなへし あさ露をわけそほちつつ花見むと今ぞの山をみなへしりぬる 朱雀院のをみなへしあはせの時に、をみなへしとい ふいつもじをくのかしらにおきてよめる をぐら山みねたちならしなくしかのへにけむ秋をしる人ぞなき きちかうの花 秋ちかうのはなりにけり白露のおけるくさばも色かはりゆく しをに ふりはへていざふるさとの花見むとこしをにほひぞうつろひにける りうたむのはな わがやどの花ふみしだくとりうたむのはなければやここにしもくる をばな ありと見てたのむぞかたきうつせみの世をばなしとや思ひなしてむ けにごし うちつけにこしとや花の色を見むおく白露のそむるばかりを 二条の后春宮のみやすん所と申しける時に、めどに けづり花させりけるをよませたまひける 花の木にあらざらめどもさきにけりふりにしこのみなるときもがな しのぶぐさ 山たかみつねに嵐の吹くさとはにほひもあへず花ぞちりける やまし 郭公みねのくもにやまじりにしありとはきけど見るよしもなき からはぎ 空蝉のからは木ごとにとどむれどたまのゆくへを見ぬぞかなしき かはなぐさ うばたまの夢になにかはなぐさまむうつつにだにもあかぬ心は さがりごけ 花の色はただひとさかりこけれども返す返すぞつゆはそめける にがたけ いのちとてつゆをたのむにかたければ物わびしらになくのべのむし かはたけ さ夜ふけてなかばたけゆく久方の月ふきかへせ秋の山風 わらび 煙たちもゆとも見えぬ草のはをたれかわらびとなづけそめけむ ささ、まつ、びは、ばせをば いさざめに時まつまにぞ日はへぬる心ばせをば人に見えつつ なし、なつめ、くるみ あぢきなしなげきなつめそうき事にあひくる身をばすてぬものから からことといふ所にて春のたちける日よめる 浪のおとのけさからことにきこゆるは春のしらべや改るらむ いかがさき かぢにあたる浪のしづくを春なればいかがさきちる花と見ざらむ からさき かの方にいつからさきにわたりけむ浪ぢはあとものこらざりけり 浪の花おきからさきてちりくめり水の春とは風やなるらむ かみやがは うばたまのわがくろかみやかはるらむ鏡の影にふれるしらゆき よどがは あしひきの山べにをれば白雲のいかにせよとかはるる時なき かたの 夏草のうへはしげれるぬま水のゆくかたのなきわが心かな かつらのみや 秋くれば月のかつらのみやはなるひかりを花とちらすばかりを 百和香 花ごとにあかずちらしし風なればいくそばくわがうしとかは思ふ すみながし 春がすみなかしかよひぢなかりせば秋くるかりはかへらざらまし おきび 流れいづる方だに見えぬ涙河おきひむ時やそこはしられむ ちまき のちまきのおくれておふるなへなれどあだにはならぬたのみとぞきく はをはじめ、るをはてにて、ながめをかけて時のう たよめと人のいひければよみける 花のなかめにあくやとてわけゆけば心ぞともにちりぬべらなる 
題しらず 郭公なくやさ月のあやめぐさあやめもしらぬこひもするかな おとにのみきくの白露よるはおきてひるは思ひにあへずけぬべし 吉野河いは浪たかく行く水のはやくぞ人を思ひそめてし 白浪のあとなき方に行く舟も風ぞたよりのしるべなりける おとは山おとにききつつ相坂の関のこなたに年をふるかな 立帰りあはれとぞ思ふよそにても人に心をおきつ白浪 世中はかくこそ有りけれ吹く風のめに見ぬ人もこひしかりけり 右近のむまばのひをりの日、むかひにたてたりける くるまのしたすだれより女のかほのほのかに見えければ、よむでつかはしける 見ずもあらず見もせぬ人のこひしくはあやなくけふやながめくらさむ 返し しるしらぬなにかあやなくわきていはむ思ひのみこそしるべなりけれ かすがのまつりにまかれりける時に、物見にいでた りける女のもとに、家をたづねてつかはせりける かすがののゆきまをわけておひいでくる草のはつかに見えしきみはも 人の花つみしける所にまかりて、そこなりける人の もとに、のちによみてつかはしける 山ざくら霞のまよりほのかにも見てし人こそこひしかりけれ 題しらず たよりにもあらぬおもひのあやしきは心を人につくるなりけり はつかりのはつかにこゑをききしより中ぞらにのみ物を思ふかな 逢ふ事はくもゐはるかになる神のおとにききつつこひ渡るかな かたいとをこなたかなたによりかけてあはずはなにをたまのをにせむ 夕ぐれは雲のはたてに物ぞ思ふあまつそらなる人をこふとて かりこもの思ひみだれて我こふといもしるらめや人しつげずは つれもなき人をやねたくしらつゆのおくとはなげきぬとはしのばむ ちはやぶるかもの社のゆふだすきひと日も君をかけぬ日はなし わがこひはむなしきそらにみちぬらし思ひやれどもゆく方もなし するがなるたごの浦浪たたぬひはあれども君をこひぬ日ぞなき ゆふづく夜さすやをかべの松のはのいつともわかぬこひもするかな 葦引の山した水のこがくれてたぎつ心をせきぞかねつる 吉野河いはきりとほし行く水のおとにはたてじこひはしぬとも たきつせのなかにもよどはありてふをなどわがこひのふちせともなき 山高みした行く水のしたにのみ流れてこひむこひはしぬとも 思ひいづるときはの山のいはつつじいはねばこそあれこひしき物を 人しれずおもへばくるし紅のすゑつむ花のいろにいでなむ 秋の野のをばなにまじりさく花のいろにやこひむあふよしをなみ わがそのの梅のほつえに鶯のねになきぬべきこひもするかな あしひきの山郭公わがごとや君にこひつついねがてにする 夏なればやどにふすぶるかやり火のいつまでわが身したもえをせむ 恋せじとみたらし河にせしみそぎ神はうけずぞなりにけらしも あはれてふ事だになくはなにをかは恋のみだれのつかねをにせむ おもふには忍ぶる事ぞまけにける色にはいでじとおもひし物を わがこひを人しるらめや敷妙の枕のみこそしらばしるらめ あさぢふのをののしの原しのぶとも人しるらめやいふ人なしに 人しれぬ思ひやなぞとあしかきのまぢかけれどもあふよしのなき 思ふともこふともあはむ物なれやゆふてもたゆくとくるしたひも いで我を人なとがめそおほ舟のゆだのたゆだに物思ふころぞ 伊勢の海につりするあまのうけなれや心ひとつを定めかねつる いせのうみのあまのつりなは打ちはへてくるしとのみや思ひ渡らむ 涙河何みなかみを尋ねけむ物思ふ時のわが身なりけり たねしあればいはにも松はおひにけり恋をしこひばあはざらめやは あさなあさな立つ河霧のそらにのみうきて思ひのある世なりけり わすらるる時しなければあしたづの思ひみだれてねをのみぞなく 唐衣ひもゆふぐれになる時は返す返すぞ人はこひしき よひよひに枕さだめむ方もなしいかにねし夜か夢に見えけむ 恋しきに命をかふる物ならばしにはやすくぞあるべかりける 人の身もならはし物をあはずしていざ心みむこひやしぬると 忍ぶれば苦しき物を人しれず思ふてふ事誰にかたらむ こむ世にもはや成りななむ目の前につれなき人を昔とおもはむ つれもなき人をこふとて山びこのこたへするまでなげきつるかな ゆく水にかずかくよりもはかなきはおもはぬ人を思ふなりけり 人を思ふ心は我にあらねばや身の迷ふだにしられざるらむ 思ひやるさかひはるかになりやするまどふ夢ぢにあふ人のなき 夢の内にあひ見む事をたのみつつくらせるよひはねむ方もなし こひしねとするわざならしむばたまのよるはすがらに夢に見えつつ 涙河枕ながるるうきねには夢もさだかに見えずぞありける 恋すればわが身は影と成りにけりさりとて人にそはぬ物ゆゑ 篝火にあらぬわが身のなぞもかく涙の河にうきてもゆらむ かがり火の影となる身のわびしきは流れてしたにもゆるなりけり はやきせに見るめおひせばわが袖の涙の河にうゑまし物を おきへにもよらぬたまもの浪のうへにみだれてのみやこひ渡りなむ あしがものさわぐ入江の白浪のしらずや人をかくこひむとは 人しれぬ思ひをつねにするがなるふじの山こそわが身なりけれ とぶとりのこゑもきこえぬ奥山のふかき心を人はしらなむ 相坂のゆふつけどりもわがごとく人やこひしきねのみなくらむ 相坂の関にながるるいはし水いはで心に思ひこそすれ うき草のうへはしげれるふちなれや深き心をしる人のなき 打ちわびてよばはむ声に山びこのこたへぬ山はあらじとぞ思ふ 心がへする物にもがかたこひはくるしき物と人にしらせむ よそにしてこふればくるしいれひものおなじ心にいざむすびてむ 春たてばきゆる氷ののこりなく君が心は我にとけなむ あけたてば蝉のをりはへなきくらしよるはほたるのもえこそわたれ 夏虫の身をいたづらになすこともひとつ思ひによりてなりけり ゆふさればいとどひがたきわがそでに秋のつゆさへおきそはりつつ いつとてもこひしからずはあらねども秋のゆふべはあやしかりけり 秋の田のほにこそ人をこひざらめなどか心に忘れしもせむ あきのたのほのうへをてらすいなづまのひかりのまにも我やわするる 人めもる我かはあやな花すすきなどかほにいでてこひずしもあらむ あは雪のたまればがてにくだけつつわが物思ひのしげきころかな 奥山の菅のねしのぎふる雪のけぬとかいはむこひのしげきに 
題しらず 思ひつつぬればや人の見えつらむ夢としりせばさめざらましを うたたねに恋しきひとを見てしより夢てふ物は憑みそめてき いとせめてこひしき時はむば玉のよるの衣を返してぞきる 秋風の身にさむければつれもなき人をぞたのむくるる夜ごとに しもついづもでらに人のわざしける日、真せい法し のだうしにていへりける事を哥によみてをののこまちがもとにつかはしける つつめども袖にたまらぬ白玉は人を見ぬめの涙なりけり 返し おろかなる涙ぞそでに玉はなす我はせきあへずたきつせなれば 寛平御時きさいの宮の哥合のうた 恋ひわびて打ちぬる中に行きかよふ夢のただぢはうつつならなむ 住の江の岸による浪よるさへやゆめのかよひぢ人めよくらむ わがこひはみ山がくれの草なれやしげさまされどしる人のなき よひのまもはかなく見ゆる夏虫に迷ひまされるこひもするかな ゆふされば蛍よりけにもゆれどもひかり見ねばや人のつれなき ささのはにおく霜よりもひとりぬるわが衣手ぞさえまさりける わがやどの菊のかきねにおくしものきえかへりてぞこひしかりける 河のせになびくたまものみがくれて人にしられぬこひもするかな かきくらしふる白雪のしたぎえにきえて物思ふころにもあるかな 君こふる涙のとこにみちぬればみをつくしとぞ我はなりぬる しぬるいのちいきもやすると心見に玉のをばかりあはむといはなむ わびぬればしひてわすれむと思へども夢といふ物ぞ人だのめなる わりなくもねてもさめてもこひしきか心をいづちやらばわすれむ 恋しきにわびてたましひ迷ひなばむなしきからのなにやのこらむ 君こふる涙しなくは唐衣むねのあたりは色もえなまし 題しらず 世とともに流れてぞ行く涙河冬もこほらぬみなわなりけり 夢ぢにもつゆやおくらむよもすがらかよへる袖のひちてかわかぬ はかなくて夢にも人を見つる夜は朝のとこぞおきうかりける いつはりの涙なりせば唐衣しのびに袖はしぼらざらまし ねになきてひちにしかども春さめにぬれにし袖ととはばこたへむ わがごとく物やかなしき郭公時ぞともなくよただなくらむ さ月山こずゑをたかみ郭公なくねそらなるこひもするかな 秋ぎりのはるる時なき心にはたちゐのそらもおもほえなくに 虫のごと声にたててはなかねども涙のみこそしたにながるれ これさだのみこの家の哥合のうた 秋なれば山とよむまでなくしかに我おとらめやひとりぬるよは 題しらず 秋ののにみだれてさける花の色のちくさに物を思ふころかな ひとりして物をおもへば秋のよのいなばのそよといふ人のなき 人を思ふ心はかりにあらねどもくもゐにのみもなきわたるかな 秋風にかきなすことのこゑにさへはかなく人のこひしかるらむ まこもかるよどのさは水雨ふればつねよりことにまさるわがこひ やまとに侍りける人につかはしける こえぬまはよしのの山のさくら花人づてにのみききわたるかな やよひばかりに物のたうびける人のもとに、又人ま かりつつせうそこすとききてつかはしける 露ならぬ心を花におきそめて風吹くごとに物思ひぞつく 題しらず わがこひにくらぶの山のさくら花まなくちるともかずはまさらじ 冬河のうへはこほれる我なれやしたにながれてこひわたるらむ たきつせにねざしとどめぬうき草のうきたるこひも我はするかな よひよひにぬぎてわがぬるかり衣かけておもはぬ時のまもなし あづまぢのさやの中山なかなかになにしか人を思ひそめけむ しきたへの枕のしたに海はあれど人を見るめはおひずぞ有りける 年をへてきえぬおもひは有りながらよるのたもとは猶こほりけり わがこひはしらぬ山ぢにあらなくに迷ふ心ぞわびしかりける 紅のふりいでつつなく涙にはたもとのみこそ色まさりけれ 白玉と見えし涙も年ふればから紅にうつろひにけり 夏虫をなにかいひけむ心から我も思ひにもえぬべらなり 風ふけば峯にわかるる白雲のたえてつれなき君が心か 月影にわが身をかふる物ならばつれなき人もあはれとや見む こひしなばたが名はたたじ世中のつねなき物といひはなすとも つのくにのなにはのあしのめもはるにしげきわがこひ人しるらめや 手もふれで月日へにけるしらま弓おきふしよるはいこそねられね 人しれぬ思ひのみこそわびしけれわが歎をば我のみぞしる 事にいでていはぬばかりぞみなせ河したにかよひてこひしきものを 君をのみ思ひねにねし夢なればわが心から見つるなりけり いのちにもまさりてをしくある物は見はてぬゆめのさむるなりけり 梓弓ひけば本末わが方によるこそまされこひの心は わがこひはゆくへもしらずはてもなし逢ふを限と思ふばかりぞ 我のみぞかなしかりけるひこぼしもあはですぐせる年しなければ 今ははやこひしなましをあひ見むとたのめし事ぞいのちなりける たのめつつあはで年ふるいつはりにこりぬ心を人はしらなむ いのちやはなにぞはつゆのあだ物をあふにしかへばをしからなくに 
やよひのついたちよりしのびに人にものらいひての ちに、雨のそほふりけるによみてつかはしける おきもせずねもせでよるをあかしては春の物とてながめくらしつ なりひらの朝臣の家に侍りける女のもとによみてつ かはしける つれづれのながめにまさる涙河袖のみぬれてあふよしもなし かの女にかはりて返しによめる あさみこそ袖はひつらめ涙河身さへ流るときかばたのまむ 題しらず よるべなみ身をこそとほくへだてつれ心は君が影となりにき いたづらに行きてはきぬるものゆゑに見まくほしさにいざなはれつつ あはぬ夜のふる白雪とつもりなば我さへともにけぬべきものを この哥は、ある人のいはく、柿本人麿が哥也 秋ののにささわけしあさの袖よりもあはでこしよぞひちまさりける 見るめなきわが身をうらとしらねばやかれなであまのあしたゆくくる あはずしてこよひあけなば春の日の長くや人をつらしと思はむ 有りあけのつれなく見えし別より暁ばかりうき物はなし 逢ふ事のなぎさにしよる浪なれば怨みてのみぞ立ち帰りける かねてより風にさきだつ浪なれや逢ふ事なきにまだき立つらむ みちのくに有りといふなるなとり河なきなとりてはくるしかりけり あやなくてまだきなきなのたつた河わたらでやまむ物ならなくに 人はいさ我はなきなのをしければ昔も今もしらずとをいはむ こりずまに又もなきなはたちぬべし人にくからぬ世にしすまへば ひむがしの五条わたりに人をしりおきてまかりかよ ひけり、しのびなる所なりければかどよりしもえいらで、かきのくづれよりかよひける を、たびかさなりければあるじききつけて、かのみちに夜ごとに人をふせてまもらすれ ば、いきけれどえあはでのみかへりてよみてやりける ひとしれぬわがかよひぢの関守はよひよひごとにうちもねななむ 題しらず しのぶれどこひしき時はあしひきの山より月のいでてこそくれ こひこひてまれにこよひぞ相坂のゆふつけ鳥はなかずもあらなむ 秋の夜も名のみなりけりあふといへば事ぞともなくあけぬるものを ながしとも思ひぞはてぬ昔より逢ふ人からの秋のよなれば しののめのほがらほがらとあけゆけばおのがきぬぎぬなるぞかなしき 曙ぬとて今はの心つくからになどいひしらぬ思ひそふらむ 寛平御時きさいの宮の哥合のうた あけぬとてかへる道にはこきたれて雨も涙もふりそほちつつ 題しらず しののめの別ををしみ我ぞまづ鳥よりさきに鳴きはじめつる ほととぎす夢かうつつかあさつゆのおきて別れし暁のこゑ 玉匣あけば君がなたちぬべみ夜ふかくこしを人見けむかも けさはしもおきけむ方もしらざりつ思ひいづるぞきえてかなしき 人にあひてあしたによみてつかはしける ねぬる夜の夢をはかなみまどろめばいやはかなにもなりまさるかな 業平朝臣の伊勢のくににまかりたりける時、斎宮な りける人にいとみそかにあひて、又のあしたに人やるすべなくて思ひをりけるあひだ に、女のもとよりおこせたりける きみやこし我や行きけむおもほえず夢かうつつかねてかさめてか 返し かきくらす心のやみに迷ひにき夢うつつとは世人さだめよ 題しらず むばたまのやみのうつつはさだかなる夢にいくらもまさらざりけり さ夜ふけてあまのと渡る月影にあかずも君をあひ見つるかな 君が名もわがなもたてじなにはなるみつともいふなあひきともいはじ 名とり河せぜのむもれ木あらはれば如何にせむとかあひ見そめけむ 吉野河水の心ははやくともたきのおとにはたてじとぞ思ふ こひしくはしたにをおもへ紫のねずりの衣色にいづなゆめ 花すすきほにいでてこひば名ををしみしたゆふひものむすぼほれつつ たちばなのきよきがしのびにあひしれりける女のも とよりおこせたりける 思ふどちひとりひとりがこひしなばたれによそへてふぢ衣きむ 返し なきこふる涙に袖のそほちなばぬぎかへがてらよるこそはきめ 題しらず うつつにはさもこそあらめ夢にさへ人めをよくと見るがわびしさ 限なき思ひのままによるもこむゆめぢをさへに人はとがめじ 夢ぢにはあしもやすめずかよへどもうつつにひとめ見しごとはあらず おもへども人めづつみのたかければ河と見ながらえこそわたらね たきつせのはやき心をなにしかも人めづつみのせきとどむらむ 寛平御時きさいの宮の哥合のうた 紅の色にはいでじかくれぬのしたにかよひてこひはしぬとも 題しらず 冬の池にすむにほ鳥のつれもなくそこにかよふと人にしらすな ささのはにおくはつしもの夜をさむみしみはつくとも色にいでめや 山しなのおとはの山のおとにだに人のしるべくわがこひめかも この哥、ある人、あふみのうねめのとなむ申す みつしほの流れひるまをあひがたみみるめの浦によるをこそまて 白河のしらずともいはじそこきよみ流れて世世にすまむと思へば したにのみこふればくるし玉のをのたえてみだれむ人なとがめそ わがこひをしのびかねてはあしひきの山橘の色にいでぬべし おほかたはわが名もみなとこぎいでなむ世をうみべたに見るめすくなし 枕より又しる人もなきこひを涙せきあへずもらしつるかな 風ふけば浪打つ岸の松なれやねにあらはれてなきぬべらなり このうたは、ある人のいはく、かきのもとの人まろ がなり 池にすむ名ををし鳥の水をあさみかくるとすれどあらはれにけり 逢ふ事は玉の緒ばかり名のたつは吉野の河のたきつせのごと むらとりのたちにしわが名今更にことなしふともしるしあらめや 君によりわがなは花に春霞野にも山にもたちみちにけり しるといへば枕だにせでねし物をちりならぬなのそらにたつらむ 
題しらず みちのくのあさかのぬまの花かつみかつ見る人にこひやわたらむ あひ見ずはこひしきこともなからましおとにぞ人をきくべかりける いその神ふるのなか道なかなかに見ずはこひしと思はましやは 君てへば見まれ見ずまれふじのねのめづらしげなくもゆるわがこひ 夢にだに見ゆとは見えじあさなあさなわがおもかげにはづる身なれば いしま行く水の白浪立ち帰りかくこそは見めあかずもあるかな いせのあまのあさなゆふなにかづくてふ見るめに人をあくよしもがな 春霞たなびく山のさくら花見れどもあかぬ君にもあるかな 心をぞわりなき物と思ひぬる見る物からやこひしかるべき かれはてむのちをばしらで夏草の深くも人のおもほゆるかな あすかがはふちはせになる世なりとも思ひそめてむ人はわすれじ 寛平御時きさいの宮の哥合のうた 思ふてふ事のはのみや秋をへて色もかはらぬ物にはあるらむ 題しらず さむしろに衣かたしきこよひもや我をまつらむうぢのはしひめ 又は、うぢのたまひめ 君やこむ我やゆかむのいさよひにまきのいたどもささずねにけり 今こむといひしばかりに長月のありあけの月をまちいでつるかな 月夜よしよよしと人につげやらばこてふににたりまたずしもあらず 君こずはねやへもいらじこ紫わがもとゆひにしもはおくとも 宮木ののもとあらのこはぎつゆをおもみ風をまつごときみをこそまて あなこひし今も見てしか山がつのかきほにさける山となでしこ つのくにのなにはおもはず山しろのとはにあひ見むことをのみこそ しきしまややまとにはあらぬ唐衣ころもへずしてあふよしもがな こひしとはたがなづけけむことならむしぬとぞただにいふべかりける 三吉野のおほかはのべの藤波のなみにおもはばわがこひめやは かくこひむ物とは我も思ひにき心のうらぞまさしかりける あまのはらふみとどろかしなる神も思ふなかをばさくるものかは 梓弓ひきののつづらすゑつひにわが思ふ人に事のしげけむ この哥は、ある人、あめのみかどのあふみのうねめ にたまひけるとなむ申す 夏びきのてびきのいとをくりかへし事しげくともたえむと思ふな この哥は、返しによみてたてまつりけるとなむ さと人の事は夏ののしげくともかれ行くきみにあはざらめやは 藤原敏行朝臣の、なりひらの朝臣の家なりける女を あひしりてふみつかはせりけることばに、いままうでく、あめのふりけるをなむ見わづ らひ侍るといへりけるをききて、かの女にかはりてよめりける かずかずにおもひおもはずとひがたみ身をしる雨はふりぞまされる ある女の、なりひらの朝臣をところさだめずありき すとおもひて、よみてつかはしける おほぬさのひくてあまたになりぬればおもへどえこそたのまざりけれ 返し おほぬさと名にこそたてれながれてもつひによるせはありてふものを 題しらず すまのあまのしほやく煙風をいたみおもはぬ方にたなびきにけり たまがつらはふ木あまたになりぬればたえぬ心のうれしげもなし たがさとに夜がれをしてか郭公ただここにしもねたるこゑする いで人は事のみぞよき月草のうつし心はいろことにして いつはりのなき世なりせばいかばかり人のことのはうれしからまし いつはりと思ふものから今さらにたがまことをか我はたのまむ 秋風に山のこのはのうつろへば人の心もいかがとぞ思ふ 寛平御時きさいの宮の哥合のうた 蝉のこゑきけばかなしな夏衣うすくや人のならむと思へば 題しらず 空蝉の世の人ごとのしげければわすれぬもののかれぬべらなり あかでこそおもはむなかははなれなめそをだにのちのわすれがたみに 忘れなむと思ふ心のつくからに有りしよりけにまづぞこひしき わすれなむ我をうらむな郭公人の秋にはあはむともせず たえずゆくあすかの河のよどみなば心あるとや人のおもはむ この哥、ある人のいはく、なかとみのあづま人がう た也 よど河のよどむと人は見るらめど流れてふかき心あるものを そこひなきふちやはさわぐ山河のあさきせにこそあだなみはたて 紅のはつ花ぞめの色ふかく思ひし心我わすれめや みちのくのしのぶもぢずりたれゆゑにみだれむと思ふ我ならなくに おもふよりいかにせよとか秋風になびくあさぢの色ことになる 千千の色にうつろふらめどしらなくに心し秋のもみぢならねば あまのすむさとのしるべにあらなくに怨みむとのみ人のいふらむ くもり日の影としなれる我なればめにこそ見えね身をばはなれず 色もなき心を人にそめしよりうつろはむとはおもほえなくに めづらしき人を見むとやしかもせぬわがしたひものとけわたるらむ かげろふのそれかあらぬか春雨のふる日となればそでぞぬれぬる ほり江こぐたななしを舟こぎかへりおなじ人にやこひわたりなむ わたつみとあれにしとこを今便にはらはばそでやあわとうきなむ いにしへに猶立ち帰る心かなこひしきことに物わすれせで 人をしのびにあひしりてあひがたくありければ、そ の家のあたりをまかりありきけるをりに、かりのなくをききてよみてつかはしける 思ひいでてこひしき時ははつかりのなきてわたると人しるらめや 右のおほいまうちぎみすまずなりにければ、かのむ かしおこせたりけるふみどもを、とりあつめて返すとてよみておくりける たのめこし事のは今はかへしてむわが身ふるればおきどころなし 返し 今はとてかへす事のはひろひおきておのが物からかたみとや見む 題しらず たまほこの道はつねにもまどはなむ人をとふとも我かとおもはむ まてといはばねてもゆかなむしひて行くこまのあしをれまへのたなはし 中納言源ののぼるの朝臣のあふみのすけに侍りける 時、よみてやれりける 相坂のゆふつけ鳥にあらばこそ君がゆききをなくなくも見め 題しらず ふるさとにあらぬ物からわがために人の心のあれて見ゆらむ 山がつのかきほにはへるあをつづら人はくれどもことづてもなし おほぞらはこひしき人のかたみかは物思ふごとにながめらるらむ あふまでのかたみも我はなにせむに見ても心のなぐさまなくに おやのまもりける人のむすめにいとしのびにあひて ものらいひけるあひだに、おやのよぶといひければ、いそぎかへるとてもをなむぬぎお きていりにける、そののちもをかへすとてよめる あふまでのかたみとてこそとどめけめ涙に浮ぶもくづなりけり 題しらず かたみこそ今はあたなれこれなくはわするる時もあらましものを 
五条のきさいの宮のにしのたいにすみける人に、ほ いにはあらでものいひわたりけるを、む月のとをかあまりになむほかへかくれにける、 あり所はききけれどえ物もいはで、又のとしのはる、むめの花さかりに月のおもしろか りける夜、こぞをこひてかのにしのたいにいきて、月のかたぶくまであばらなるいたじ きにふせりてよめる 月やあらぬ春や昔の春ならぬわが身ひとつはもとの身にして 題しらず 花すすき我こそしたに思ひしかほにいでて人にむすばれにけり よそにのみきかまし物をおとは河渡るとなしに見なれそめけむ わがごとく我をおもはむ人もがなさてもやうきと世を心見む 久方のあまつそらにもすまなくに人はよそにぞ思ふべらなる 見ても又またも見まくのほしければなるるを人はいとふべらなり 雲もなくなぎたるあさの我なれやいとはれてのみ世をばへぬらむ 花がたみめならぶ人のあまたあればわすられぬらむかずならぬ身は うきめのみおひて流るる浦なればかりにのみこそあまはよるらめ あひにあひて物思ふころのわが袖にやどる月さへぬるるかほなる 秋ならでおく白露はねざめするわがた枕のしづくなりけり すまのあまのしほやき衣をさをあらみまどほにあれや君がきまさぬ 山しろのよどのわかごもかりにだにこぬ人たのむ我ぞはかなき あひ見ねばこひこそまされみなせ河なににふかめて思ひそめけむ 暁のしぎのはねがきももはがき君がこぬ夜は我ぞかずかく 玉かづら今はたゆとや吹く風のおとにも人のきこえざるらむ わが袖にまだき時雨のふりぬるは君が心に秋やきぬらむ 山の井の浅き心もおもはぬに影ばかりのみ人の見ゆらむ 忘草たねとらましを逢ふ事のいとかくかたき物としりせば こふれども逢ふ夜のなきは忘草夢ぢにさへやおひしげるらむ 夢にだにあふ事かたくなりゆくは我やいをねぬ人やわするる もろこしも夢に見しかばちかかりきおもはぬ中ぞはるけかりける 独のみながめふるやのつまなれば人を忍ぶの草ぞおひける わがやどは道もなきまであれにけりつれなき人をまつとせしまに 今こむといひてわかれし朝より思ひくらしのねをのみぞなく こめやとは思ふ物からひぐらしのなくゆふぐれはたちまたれつつ 今しはとわびにし物をささがにの衣にかかり我をたのむる いまはこじと思ふ物から忘れつつまたるる事のまだもやまぬか 月よにはこぬ人またるかきくもり雨もふらなむわびつつもねむ うゑていにし秋田かるまで見えこねばけさはつかりのねにぞなきぬる こぬ人を松ゆふぐれの秋風はいかにふけばかわびしかるらむ ひさしくもなりにけるかなすみのえの松はくるしき物にぞありける 住の江の松ほどひさになりぬればあしたづのねになかぬ日はなし 仲平朝臣あひしりて侍りけるを、かれ方になりにけ れば、ちちがやまとのかみに侍りけるもとへまかるとてよみてつかはしける みわの山いかにまち見む年ふともたづぬる人もあらじと思へば 題しらず 吹きまよふ野風をさむみ秋はぎのうつりも行くか人の心の 今はとてわが身時雨にふりぬれば事のはさへにうつろひにけり 返し 人を思ふ心のこのはにあらばこそ風のまにまにちりもみだれめ 業平朝臣、きのありつねがむすめにすみけるを、 うらむることありて、しばしのあひだひるはきてゆふさりはかへりのみしければ、よ みてつかはしける あま雲のよそにも人のなりゆくかさすがにめには見ゆる物から 返し ゆきかへりそらにのみしてふる事はわがゐる山の風はやみなり 題しらず 唐衣なれば身にこそまつはれめかけてのみやはこひむと思ひし 秋風は身をわけてしもふかなくに人の心のそらになるらむ つれもなくなりゆく人の事のはぞ秋よりさきのもみぢなりける 心地そこなへりけるころ、あひしりて侍りける人の とはで、ここちおこたりてのちとぶらへりければ、よみてつかはしける しでの山ふもとを見てぞかへりにしつらき人よりまづこえじとて あひしれりける人の、やうやくかれがたになりける あひだに、やけたるちのはにふみをさしてつかはせりける 時すぎてかれゆくをののあさぢには今は思ひぞたえずもえける 物おもひけるころ、ものへまかりけるみちに野火の もえけるを見てよめる 冬がれののべとわが身を思ひせばもえても春をまたまし物を 題しらず 水のあわのきえてうき身といひながら流れて猶もたのまるるかな みなせ河有りて行く水なくはこそつひにわが身をたえぬと思はめ 吉野河よしや人こそつらからめはやくいひてし事はわすれじ 世中の人の心は花ぞめのうつろひやすき色にぞありける 心こそうたてにくけれそめざらばうつろふ事もをしからましや 色見えでうつろふ物は世中の人の心の花にぞ有りける 我のみや世をうくひずとなきわびむ人の心の花とちりなば 思ふともかれなむ人をいかがせむあかずちりぬる花とこそ見め 今はとて君がかれなばわがやどの花をばひとり見てやしのばむ 忘草かれもやするとつれもなき人の心にしもはおかなむ 寛平御時御屏風に哥かかせ給ひける時、よみてかき ける 忘草なにをかたねと思ひしはつれなき人の心なりけり 題しらず 秋の田のいねてふ事もかけなくに何をうしとか人のかるらむ はつかりのなきこそわたれ世中の人の心の秋しうければ あはれともうしとも物を思ふ時などか涙のいとなかるらむ 身をうしと思ふにきえぬ物なればかくてもへぬるよにこそ有りけれ あまのかるもにすむむしの我からとねをこそなかめ世をばうら見じ あひ見ぬもうきもわが身のから衣思ひしらずもとくるひもかな 寛平御時きさいの宮の哥合のうた つれなきを今はこひじとおもへども心よわくもおつる涙か 題しらず 人しれずたえなましかばわびつつもなき名ぞとだにいはましものを それをだに思ふ事とてわがやどを見きとないひそ人のきかくに 逢ふ事のもはらたえぬる時にこそ人のこひしきこともしりけれ わびはつる時さへ物の悲しきはいづこをしのぶ涙なるらむ 怨みてもなきてもいはむ方ぞなきかがみに見ゆる影ならずして 夕されば人なきとこを打ちはらひなげかむためとなれるわがみか わたつみのわが身こす浪立ち返りあまのすむてふうらみつるかな あらを田をあらすきかへしかへしても人の心を見てこそやまめ 有そ海の浜のまさごとたのめしは忘るる事のかずにぞ有りける 葦辺より雲ゐをさして行く雁のいやとほざかるわが身かなしも しぐれつつもみづるよりも事のはの心の秋にあふぞわびしき 秋風のふきとふきぬるむさしのはなべて草ばの色かはりけり あきかぜにあふたのみこそかなしけれわが身むなしくなりぬと思へば 秋風の吹きうらがへすくずのはのうらみても猶うらめしきかな あきといへばよそにぞききしあだ人の我をふるせる名にこそ有りけれ わすらるる身をうぢはしの中たえて人もかよはぬ年ぞへにける 又は、こなたかなたに人もかよはず あふ事をながらのはしのながらへてこひ渡るまに年ぞへにける うきながらけぬるあわともなりななむ流れてとだにたのまれぬ身は 流れては妹背の山のなかにおつるよしのの河のよしや世中 
いもうとの身まかりける時よみける なく涙雨とふらなむわたり河水まさりなばかへりくるがに さきのおほきおほいまうちぎみを、しらかはのあた りにおくりける夜よめる ちの涙おちてぞたぎつ白河は君が世までの名にこそ有りけれ ほりかはのおほきおほいまうち君、身まかりにける 時に、深草の山にをさめてけるのちによみける 空蝉はからを見つつもなぐさめつ深草の山煙だにたて ふかくさののべの桜し心あらばことしばかりはすみぞめにさけ 藤原敏行朝臣の身まかりにける時によみてかの家に つかはしける ねても見ゆねでも見えけりおほかたは空蝉の世ぞ夢には有りける あひしれりける人の身まかりにければよめる 夢とこそいふべかりけれ世中にうつつある物と思ひけるかな あひしれりける人のみまかりにける時によめる ぬるがうちに見るをのみやは夢といはむはかなき世をもうつつとはみ ず あねの身まかりにける時によめる せをせけばふちとなりてもよどみけりわかれをとむるしがらみぞなき 藤原忠房がむかしあひしりて侍りける人の身まかり にける時に、とぶらひにつかはすとてよめる さきだたぬくいのやちたびかなしきはながるる水のかへりこぬなり きのとものりが身まかりにける時よめる あすしらぬわが身とおもへどくれぬまのけふは人こそかなしかりけれ 時しもあれ秋やは人のわかるべきあるを見るだにこひしきものを ははがおもひにてよめる 神な月時雨にぬるるもみぢばはただわび人のたもとなりけり ちちがおもひにてよめる ふぢ衣はつるるいとはわび人の涙の玉のをとぞなりける おもひに侍りけるとしの秋、山でらへまかりけるみ ちにてよめる あさ露のおくての山田かりそめにうき世中を思ひぬるかな おもひに侍りける人をとぶらひにまかりてよめる すみぞめの君がたもとは雲なれやたえず涙の雨とのみふる 女のおやのおもひにて山でらに侍りけるを、ある人 のとぶらひつかはせりければ、返事によめる あしひきの山べに今はすみぞめの衣の袖はひる時もなし 諒闇の年池のほとりの花を見てよめる 水のおもにしづく花の色さやかにも君がみかげのおもほゆるかな 深草のみかどの御国忌の日よめる 草ふかき霞の谷に影かくしてるひのくれしけふにやはあらぬ ふかくさのみかどの御時に、蔵人頭にてよるひるな れつかうまつりけるを、諒闇になりにければ、さらに世にもまじらずしてひえの山にの ぼりてかしらおろしてけり、その又のとし、みなひと御ぶくぬぎて、あるはかうぶりた まはりなどよろこびけるをききてよめる みな人は花の衣になりぬなりこけのたもとよかわきだにせよ 河原のおほいまうちぎみの身まかりての秋、かの家 のほとりをまかりけるに、もみぢのいろまだふかくもならざりけるを見てよみていれた りける うちつけにさびしくもあるかもみぢばもぬしなきやどは色なかりけり 藤原たかつねの朝臣の身まかりての又のとしの夏、 ほととぎすのなきけるをききてよめる 郭公けさなくこゑにおどろけば君を別れし時にぞありける さくらをうゑてありけるに、やうやく花さきぬべき 時に、かのうゑける人身まかりにければ、その花を見てよめる 花よりも人こそあだになりにけれいづれをさきにこひむとか見し あるじ身まかりにける人の家の梅花を見てよめる 色もかも昔のこさににほへどもうゑけむ人の影ぞこひしき 河原の左のおほいまうちぎみの身まかりてののち、 かの家にまかりてありけるに、しほがもといふ所のさまをつくれりけるを見てよめる |
| Japanese Text Initiative Electronic Text Center | University of Virginia Library PO Box 400148 | Charlottesville VA 22904-4148 434.243.8800 | fax: 434.924.1431 |
Etext Home | Library Home | Search the Library Web
Contact Us:UVA Library Feedback Last Modified: Tuesday, August 31, 2004 © 2025 The Rector and Visitors of the University of Virginia |